لاہور (محمد قربان)‌ دریچے فلمز نے پاکستانی ناظرین کے لیے اپنی نئی فلم “چکڑ” کا ٹریلر جاری کردیا۔ یہ کرائم تھرلر جو ظہیرالدین کی ڈائرکٹریل ڈیبیو ہے، 22 دسمبر 2023 کو ملک بھر کے سینما گھروں میں نمائش کے لیے پیش کی جائے گی۔ ظہیر نے متعدد معروف ٹی وی اشتہارات میں سحر انگیز کہانی نویسی اور منفرد انداز کے ذریعے خاص پہچان حاصل کی ہے۔ انہوں نے نہ صرف یہ اشتہارات پروڈیوس کیے بلکہ اکثریت کے کانسیپٹ اور اسکرپٹنگ میں بھی کلیدی کردار ادا کیا۔ ٹریلر لانچ کے موقع پر، رائٹر اور ڈائریکٹر ظہیرالدین نے کہا کہ “چکڑ” ہمارے معاشرے کی اُن تلخ حقیقتوں کو بیان کرتی ہے جس کے بارے میں جانتے سب ہیں مگر اکثر نظر انداز کرنے کا انتخاب کرتے ہیں۔ انہوں نے مزید کہا، “اس فلم کا سنیمیٹک سفر اور اس کی کہانی ہمارے ملک کی پیچیدگیوں کا مشاہدہ کرتے ہوئے سسپنس، ڈرامے اور حقیقت پسندی کو ایک انوکھے امتزاج میں پیش کرے گی ۔”
فلم کا تھیٹریکل ٹریلر سنجیدگی، تخلیقی صلاحیت، دل چسپ حالات، حساس موضوعات اور حقیقت پسندانہ مناظر کی شمولیت سے ایک الگ انداز کی فلم کا عہد کرتا نظر آتا ہے۔ پنجاب کے ایک چھوٹے سے قصبے پر مبنی دریچے فلمز کی یہ پروڈکشن ایک جاندار کرائم سسپنس تجربے کی ضمانت دیتی ہے۔ “چکڑ” جو کہ 8 دنوں پر محیط ایک سماجی ڈائری ہے، جس میں عثمان مختار، اشنا شاہ، فریال محمود، نوشین شاہ، سلیم معراج، علی شیخ، عدنان شاہ ٹیپو سمیت ٹی وی اور تھیٹر کے دیگر تجربہ کار اداکاروں کی شاندار پرفارمنس پیش کی گئی ہے۔